"السيسي": هدف قناة السويس الجديدة كان استعادة الثقة لدى المواطن

قال الرئيس عبدالفتاح السيسي، إن الهدف الأول لمشروع قناة السويس الجديدة كان استعادة ثقة المواطن المفقودة والأمل الضائع، مضيفًا أنه نُفِّذ في خضم مواجهة الدولة للإرهاب.

وأضاف “السيسي” ضمن فعاليات مؤتمر حكاية وطن المنعقد في العاصمة الإدارية الجديدة، اليوم السبت، أن المشروع كان مخططا، وأن هيئة قناة السويس أعدت الدراسات اللازمة وسعت لتنفيذه خلال السنوات الماضية.

وتابع: "هقول حاجة أول مرة أقولها في العلن.. وإحنا بنعمل المشروع.. الدكتور أشرف سالمان وزير الاستثمار قالي عاوزين نعمل باقتصادات (الهيئة).. قلتله طيب، بس أنا عاوز أدي الأمل للناس، كانت الفايدة وقتها 10.5%.. قلتله إحنا هنعلن فتح باب المساهمة في إنشاء القناة بـ12% علشان الناس تتحرك بسرعة ويروحوا يحطوا فلوسهم، ويحسوا إن فيه حاجة كبيرة بيساهموا فيها".

واستكمل: "قلنا المشروع اللي ميخلصش في فترة من ثلاث لخمس سنوات.. ويا كامل يا وزير ربنا يكرمك.. المشروع ده مكنش يتعمل في سنة لكن الباني طالع".

وأشار إلى أن المصفوفة المالية كانت نحو 68 مليار جنيه، عليها عوائد تلتزم الحكومة بسدادها، لكن بعد أسبوع من فتح الباب أصبح على الدولة التزام بتقديم الأرباح للمواطنين.

ولفت إلى أنه لم ينظر إلى الالتزامات المالية بقدر ما اهتم بالعائد المعنوي بين جموع المواطنين.

اهتزاز الثقة

وقال “السيسي”، إن مشكلة مصر في السنوات الماضية هي اهتزاز ثقة المصريين أنفسهم.

وأضاف: "الناس مكنتش مصدقة إن ممكن نعمل طريق أو كوبري.. واستكتروا على نفسهم طريق وكوبري وقالك ده كتير.. كتير إيه يا راجل، ده لسه بدري أوي من العمل والجهد والمثابرة".

وتابع: "لو كان البناء والتنمية والتقدم ثمنه الجوع والحرمان اوعوا يا مصريين متقدمهوش.. اوعوا تقولوا ناكل أحسن".

واستكمل:"والله العظيم لو ثمن التقدم والازدهار للأمة إنها متاكلش ومتشربش زي ما الناس بتاكل وتشرب يبقى مناكلش ومنشربش".

وسأل المصريين قائلا: "إنتو عاوزين يبقى لكم مكان على الخريطة في دولة 95% منها أرض صحراء".

واعتبر “السيسي”، إن أعداء الوطن يتحرون الكذب عن الدولة.

وأضاف أنهم: "بيتحروا الكذب وعاوزين يبقوا مكتوبين عند ربهم كدابين ومخربين ومدمرين".

وتابع: "حجم الإثم والظلم اللي بيتحمله الأشرار فوق خيالكم بسبب كل يوم بيعدي على شعب يتنكد عليه.. همّ فاكرين العملية ماشية كده.. لا مش ماشية كده".

"أبواق كذب"

وأضاف: "فيه أبواق كذب وافتراء وشائعات بتقدح في كل إجراء أو مسار ناخده.. أنت كمان مش محل تقدير من ناسك اللي أنت بتعمل لأجل خاطر ربنا وخاطرهم".

وتابع: "وأنت بتعمل كده بيتم الإساءة لك والإساءات للمسئولين مش ليهم بس، لكن لأسرهم كمان.. لكن لا بأس.. مفيش حاجة بتروح عند ربنا، كل كلمة كذب لها أجر وكل إساءة لها أجر".

واستكمل: "فيه يوم هنقف قدام ربنا وهنتحاسب.. اللي هيحاسب ربنا اللي لا بيغفل ولا ينام.. وكل تفاصيل الإفك والمكر اللي اتعملت على مصر في آخر 10 سنين كانت امتداد لبناء حالة من عدم الثقة للإنسان المصري وتبقى جزء من الشخصية المصرية علشان تكون متشككة وغير واثقة في نفسها وبلدها".

وتابع: "ده بناء فكري وجداني اتعمل لمصر خلال 50 سنة، وهم يعتقدون إنهم يقدروا يبنوا أمة.. الأمة تقوم من خلال البناء والإصلاح فقط وليس الخراب والإساءة والإهانة والهدم والتشكيك".

وشهدت قاعة الماسة بالعاصمة الإدارية الجديدة، انطلاق مؤتمر "حكاية وطن"، اليوم السبت حتى الاثنين المقبل، بحضور الرئيس السيسي، وعدد من الوزراء، والسياسيين، والشباب والإعلامين وممثلين من جميع فئات المجتمع، لعرض إنجازات الدولة المصرية في مختلف المجالات.

ويشهد اليوم الأول جلسات مهمة تركز على محاور الاقتصاد، ويشارك فيها كبار الوزراء، حيث يحضر الدكتورة هالة السعيد وزيرة التخطيط والتنمية الاقتصادية، والدكتور محمد معيط وزير المالية، وأحمد سمير وزير التجارة والصناعة، والدكتورة رانيا المشاط وزيرة التعاون الدولي، وتتناول هذه الجلسات سياسات وبرامج الحكومة في دعم الاقتصاد المصري.