"باسم يوسف" لمنتقدي "محمد صلاح": مش شغلته الكلام زيي.. وكل واحد أدرى بالضغوط اللي عليه
وجه الإعلامي الساخر باسم يوسف رسالة إلى منتقدي اللاعب محمد صلاح نجم المنتخب المصري ولاعب نادي ليفربول الإنجليزي، مدافعا عنه عقب الفيديو الذي نشره الأخير حول موقفه من القضية الفلسطينية ودعم غزة في قصفها من قبل الاحتلال الإسرائيلي.
وكتب "يوسف" على صفحته الشخصية على موقع التواصل الاجتماعي "فيس بوك"، قائلا، "أنا شفت الصورة دي في كذا صفحة مع تعليق : محمد صلاح متصور مع فخر العرب. ده غير بوستات تانية كتيرة جدا يا اما بتقارن لقائي مع الفيديو بتاعه او بتقلل و تهمش و تتريق على فيديو صلاح".
وتابع، "طيب كذا نقطة:المفروض في عالم طبيعي ان لعيب الكورة أو حتى الكوميديان يكونوا في الصفوف الاولى للدفاع عن القضايا الانسانية.. ده دور الاعلام.. والسبب ان اللي بيحصل غير كده ان الاعلام بيفشل في ده بل و بيزيد الامور سوءا فتتجه الناس للاشخاص الناجحين في مجالهم عشان يغطوا على فشل في مجال مش بتاعهم و ده اول السكة في اننا بنظلمهم معانا. صلاح لعيب كورة.. لا يتدخل في السياسة من اول يوم. و لا، احتفاله بالكريسماس مش رسالة سياسية.. الاحتفال بأي مناسبة ده نشاط انساني بحت ولا يجب مقارنة صورة جنب شجرة كريسماس او حلويات المولد بوضع علم أو رمز للتضامن".
وأكمل، " تعزيته في موت ملكة انجلترا هو ايضا فعل انساني وليس سياسي، صلاح أو أي لاعب كرة لو كان بيلعب في دوريات الخليج و لاقدر الله لو أمير او ملك أو شيخ أو حاكم الدولة أو الامارة او المحافظة اللي فريقه بيلعب له توفاه الله كان حيكتب تعزية برضة لأن ملكة انجلترا عند الانجليز اللي بيلعب عندهم مكانتها في قلوب ناس كتير جدا زي مكانة هذا الملك او الامير في قلب شعبه. فده بروتوكول وليس فعل سياسي".
مقارنة الفيديو بالحوار ظالمة
وأضاف، "مقارنة فيديو صلاح باللقاء بتاعي هو ظلم بين. لأن الكلام مش شغلة صلاح. ولأن طلاقة اللغة مش شغلة صلاح. لا صلاح حيعرف يتكلم و يحاور زيي ولا انا أقدر العب كورة زي صلاح.. يا جدعان ده انا اكبر انجازاتي الكروية اني عملت تلات عمليات غضروف و انا عندي ركبتين اتنين بس!!!! ده انا خدت كباري بعدد شعر راسي. و لو على اللغة، صلاح، اللي ما دخلش مدارس لغات زيي بيتكلم ايطالي. انا معرفش كلمتين ايطالي على بعض".
وتابع، "صلاح بالانجليزي المكسر والأداء “الفلات” او المخطوف زي ما ناس وصفته، الاداء “الوحش” ده عمل ملايين التفاعلات و المشاهدات . كونه بقى ان :الكلام مايع ، مافيش ادانة واضحة، مسك العصاية من النص. قصف الجبهات مش دور صلاح خالص.. وأصلا هو فيديو غير موجه لينا. ورب فيديو بسيط من غير عياط ومن غير نرفزة ومن غير شتيمة ومن غير ادانات وشجب وعياط ودموع لكن يوصل برة ويغير صوت واحد ده ابرك بكتير".
"صلاح" وصل متأخر
وأكمل، "واحد زي صلاح، ملهم لأجيال كتيرة قصة كفاح غير مسبوقة، راجل بيتبرع في السر أكتر من العلن، فاتح بيوت انا وانتم مش عارفين عددها، واحد زي ده نخسره ليه؟ عشان ما شفاش غليلك في قضية بقالها ييجي ميت سنة اعتى الانظمة واكبر الدول فشلوا فيها؟ أتأخر؟ ياسيدي المهم انه وصل. مش قوي بما فيه الكفاية؟ اه بالنسبة لك، لكن بالنسبة لناس كتيرة قوي قوي قوي دي ممكن يكون اول مرة يسمعوا فيها عن القضية. الدنيا برة غير خالص الوطن العربي عندنا بس ده له بوست لوحده".
وأضاف، " فاكرين لما صلاح نزل صورته في القدس وكتب تضامن؟ اتشتم برضة. طيب لما يبقى عندنا واحد بوزن صلاح و كل شوية نشتمه عشان ماعملش اللي احنا عشمانين فيه، طيب على الاقل لو ما شجعناش صلاح مش لازم ندوس عليه. صلاح مش المفروض يكون هو هدف لغضبك".
وتابع، "أنا مريت بالفترة دي: ساكت ليه، ما تعمل زي فلان ما تقول زي علان؟ كل واحد و ظروفه و حساباته.. لا يكلف الله نفسا الا وسعها. كل واحد ادرى بالضغوط اللي عليه.. بلاش نكون احنا كمان سبب زيادة في الضغط عليه.. في الاخر كل واحد ورأيه.. كل واحد يحب و يكره اللي هو عايزه. لو حبيت صلاح او كرهته انت حر، البوست ده مش حيغير حاجة. و دي صورتي مع فخر العرب، محمد صلاح".
