مجرد شعر.. قصيدة عامية.. مصطفى زيكو

أنا حكتب...
لأ مش كاتب
مطلعش الشعر 
طريق نمشيه
مطلعش مراكب
ضد البحر
مطلعش غموس
لفقير 
الشعر مجرد
صوره فى برواز 
حبة أحاسيس 
متراكمه من أول جرح
فراق 
مزيكا مابتعزفهاش 
النايات 
كراكيب مركونه 
كل أما تفتحها 
مليانه مسامير بتشكك
وبارود عطلان
مابيقتلش 
خمره ماتسكرش 
فكره ملهاش رجلين 
توجع فى الراس
بنت اتخبت فى صدرك 
عن عين الناس 
قام مات الحب 
جناحات ملهاش طير
متمسك بيها مطارتش 
الشعرفتات إنسانى 
دهسوه فى الحرب
وبطل رومانسى
بشفايف صامته
ماتكلمش 
الشعر الغش 
يعملك قبه من الحبه
وتصدق فيه
لكنى كل أما ببص لطفل 
يتيم بلا مأوى 
يترجم جوايا قصيده
كأنى بسجل مأساة العالم كله
من قلب عنيه 
أكتب وأنا ببكى عليه 
وعليا 
أنا اصغر من إنى أأويه 
احميه من بكره الظالم
أو حتى أعلم قلبه
إزاى يتحرر م الخوف 
الشعر الوهم 
اللى مزيف بؤس الأشياء 
علشان تتعاش 
وعيونك 
مش أجمل شئ 
فى الكون
ده مجرد شعر