نائب لـ«الحكومة»: «غرقتونا وخنقتونا إحنا واللي خلفونا واللي خلفناهم واللي هيخلفوهم»
أعلن عضو مجلس النواب، فريدي البياضي، رفضه للحساب الختامي المقدم للحكومة لموازنة 2022/2023، قائلًا: «كفاية، كفاية ديون، غرقتونا وخنقتونا إحنا واللي خلفونا واللي خلفناهم واللي هايخلفوهم».
وتابع: «الوزير بيقول أرقام ونسب وبيحاول يثبت أن نسبة الدين في تحسن، يا إما أرقامك وهمية يا وزير، وأنا متأكد من كدا لأن الـ٨٧٪ دول مش حاطط فيهم ٢٤٪ ديون الهيئات الاقتصادية وحاسب سعر الدولار على ١٨، يا اما لو انت صح يبقى إحنا اللي واهمين».
حجم الدين الخارجي
وأضاف: «المواطن اللي بيعاني كل يوم وبيصرخ دا مواطن مش حقيقي، إحنا بنتكلم على إجمالي ديون تعدت الـ١٠ تريليون وتجاوزت إجمالي الناتج المحلي وفوائد ديون بتاكل نصف المصروفات، كفاية انتهاك للدستور».
وأردف: «حرام عليكم أنتم أقسمتم على احترام الدستور، النسب اللي حددها الدستور للتعليم والصحة في ٢٠١٤ واللي مفروض تزيد كل سنة، الحكومة ما بتصرفش ربع النسب دي، الوطن لن ينصلح حاله إلا لما تعرفوا أهمية وأولوية التعليم و الصحة، وتعرفوا أن الحل في الاستثمار في البشر مش في الحجر».
و ختم النائب كلمته قائلاً: «كفاية على الحكومة، إحنا قدام حكومة لا تحكم، ولا تستطيع أن تحكم، حكومة حققت العدالة الاجتماعية بأن أفقرت كل طبقات الشعب، بلا استثناء، مكملًا: «من ٣ سنين تحت قبة المجلس طالبت وحدي بإقالة الحكومة، واليوم معي كثير من النواب وجموع الشعب نصرخ.. كفاية كفاية كفاية».
