السيسي: الدولة مش أكل وشرب.. اللي عايز يبني بلد مابيخافش

قال الرئيس عبد الفتاح السيسي، إن الدولة أعادت ضبط أمور ميناء الإسكندرية بشكل جيد، متابعًا: "لما كنا بنيجي نعيد ضبط الموضوعات في بلادنا كان منها ميناء الإسكندرية وممكن أتكلم عن ميناء دمياط كمان، إحنا مكناش بنعمل ميناء في أرض فاضية ولكن ميناء أهدرت حدودها وضاعت معالمها".

ووجه الرئيس، سؤالًا لوزير النقل كامل الوزير، بافتتاح ميناء الإسكندرية: "إحنا بدأنا نعمل حاجة مش في ظروف عادية خالص، وخاصة ميناء دمياط وحجم قضايا التحكيم اللي إحنا دخلنا فيها نتيجة أحداث 2011، طب أنا بقول كده ليه.. بقول للمستثمرين بصوا أنتو بتحطوا أيديكم في يد دولة بتكافح علشان تحط نفسها على خريطة الدنيا، الناس كانت بانية عمارة ومدرسة جوه الميناء".

وأردف: "أنا يهمني أقول التاريخ علشان تعرفوا إزاي.. لما رحت جرجوب أنا ماشفتش ده، ولما رحت برنيس ما اتعذبتش ولا صرفت أكتر من أن أعمل المنشأ نفسه، أصعب حاجة إنك تخش على مكان حصل فيه تشويه كبير جدا وبتواجد لناس وأنت مضطر تمشيهم، لما تمشيهم ماتظلمهومش وتصرف كمان، علشان ميناء الإسكندرية يبقى بالمستوى ده ويكون درة مصر، إحنا بنتكلم في أرقام كبيرة جدا جدا علشان بس تسوية الموضوع، فيه تفاصيل كتير جدا جدا"

وتابع الرئيس: "أنا لما بكلمكم كده يا مصريين علشان تعرفوا يعني إيه دولة، والدولة مش أكل وشرب، الدولة حاجة تانية خالص غير اللي إحنا بنتكلم فيه علشان كده بكتر في الكلام"، مكملًا: "اللي عايز يبني بلد مابيخافش أبدا إلا من ربنا سبحانه وتعالى اللي هيحاسبه، علشان فيه كتير يقولك الطريق ده بتعمله ليه وبتردم هنا ليه، المستقبل بتاع البلد دي لو ماكنش فيه بنية أساسية تليق بدولة يبقى أنتو مش بتعمل مستقبل خالص".

واستكمل: "هو إحنا حرمنا الناس علشان نعمل ده.. لأ.. احنا بنقسو على نفسنا شوية.. أيوه.. أرجو الضيوف اللي عندنا ماتضيقوش من كلامي.. انتو حاجة في بلادكم واحنا حاجة تانية.. إحنا بنمثل جنوب المتوسط بتحدياته ومشاكله، وأنتم في بلادكم خلصوا الكلام ده من زمان، عندكم شبكة سكة حديد وطرق تربط القارة الأوروبية بالكامل، وعندكم مصانع وغيره.. إحنا بنحاول نعمل حاجة علشان نعيش إحنا كمان".