الرئيس السيسي: خصصنا 2 تريليون جنيه لـوزارة «النقل» منذ تولي كامل الوزير
أعلن الرئيس عبدالفتاح السيسي، تخصيص 2 تريليون جنيه لوزارة النقل، منذ تولي الفريق كامل الوزير المسؤولية، متابعًا: "حد يقولي على مدى الـ30 سنة اللي فاتوا وزارة النقل خدت كام، أنا بقولكم الكلام ده علشان أقولكم إننا بنحفر مستقبل بلدنا، أنا ماعنديش أي شك في ده، الناس في مصر لازم تسمع كويس إن كل طوبة بتتعمل في البلد دي أنا معاها وشايفها".
وأوضح الرئيس، خلال افتتاح ميناء الإسكندرية، أن الموانئ لم تشهد تطويرا مدة 25 عاما، مضيفا:" الرؤية علشان تتحقق وتحويل الدولة من حالة الى حالة تانية ورا منها أفكار وجهد وحاجات كثيرة على بعضها.. وعلشان الدولة تأخذ مكانها وتستفيد من موقعها لابد من بذل جهد وتخطيط وتنفيذ وأرقام كبيرة جدا تضخ هنا".
وذكر السيسي، أن المسار الذي تسلكه الدولة على مدار 25 عاما، كان جيدا، لكن من الممكن أن يكون هناك أكثر من ذلك، مردفًا: "إذا كنا عاوزين نستفيد من موقعنا الجغرافي اللي هو موجود وعلى محور شريان رئيسي للتجارة العالمية يمثل 12 - 13 % من التجارة العالمية.. طيب بعمل إيه؟.. قاعد بقالي سنين كتير بتفرج على ده وساكت .. ومقصدش من الكلام ده أتهم أي حد.. لكن لما جت الفرصة بنعملها".
وأشار الرئيس إلى إضافة 18 كيلو متر أرصفة في الإسكندرية في أقل من سنتين، متابعًا: "خلوا بالكم أقل من سنتين بتضغط على نفسك ومواردك علشان تعمل كده وتحط نفسك على خريطة لأن الدنيا بتتغير وبتخلق محاور ..ومن حق الناس تستفيد من موقعها وقدراتها".
وأكمل: "طيب هنعقد من غير ما نتحرك ونسيب بلدنا.. لازم نقول ليه ونشير أن 25 سنة مزودناش.. طيب في عمر الدول حجم التطور يقعد 25 سنة؟ طيب كامل قالي ايه زودنا 4 مليون متر.. كام منهم على البحر؟..الحتة دي مكنتش موجودة قبل كده خالص.. طيب بكام المتر؟ .. لا يقل عن 3 – 4 آلاف دولار.. دي اللى الكراكات والعربيات شالته وجابته هنا بدل ما نرميه في عمق البحر الأحمر.
وأكد الرئيس السيسي أن ما تفعله الدولة من تنمية يستهدف أولاد وأحفاد المصريين، مضيفًا:"الناس اللي في مصر لازم تعرف إن هو ده المستقبل.. كان فيه شاب في البحيرة إمبارح بيقولي عاوز أطمن على بكره بتاعي..صحيح !!!..كل اللى بنعمله مش علشانا إحنا ..علشان ولاد مصر وأحفادهم".
