هلال عبد الحميد يكتب: سرقة الكهرباء، الشعب للحكومة: احنا مش حرامية إنتِ اللي حرامية

تعايرنا الحكومة، وتتهمنا كشعب بسرقة التيار الكهربائي، وحطتنا احنا الشعب بالمقلوب على حمار وزفتنا زفة الحرامي في السوق، وخلت اللي ما يشتري يتفرج من شعوب العالم وبقت فضيحتنا بجلاجل  وجرستنا بحناجل  وبقى المصريين بره بيمشوا ف حارات وزقاقات لندن وباريس الخلفية علشان الناس متشفهمش وتقول: الحرامية أهُم، ولسان حالهم بيلطم ويعدد بكلمات عمنا بيرم التونسي ( يا ريت يا اخوانا مرحتش لندن ولا باريس). 

•  وليل نهار سَلَّطت الحكومة كلابها المسعورة عبر قنواتها المضروبة تغني (الشعب الحرامي أهه…  الشعب الحرامي يا أولاد الحلال  ) 

• ورددت كل المواقع الحكومية تصريحات الحكومة باستخدام الأجهزة الذكية لكشف سرقات  الشعب للتيار ( يا رب يفرمكم سلك الضغط العالي بتاع العلمين زي ما فضحتونا وجرستونا وسط شعوب المنطقة ) قولوا : آمين 

• ودخل البرطمان  على الخط ، وهددوا بشيل الدعم من حرامية الكهرباء المصريين وهيحطوا شوية مقترحات برغبة تظبط الشعب الحرامي اللي انتخبهم بالصندوق 

• وزي ما بيقول المثل – مع كامل احترامنا للغجر – ( الغجرية ست جيرانها ) فالحكومة ستنا وست ستنا، واللي مش عاجبه فنادق الإصلاح والتأهيل ترحب بيكم وهنَّدوركم في قضايانا  على مزاجنا، وهنضلم عليكم زنازينا  الفندقية يا نُزلا يا معرضين يا ولاد الـ…،  وهنطلعكم بعفو وبمزاجنا و لما تيجوا على بالنا وهتشكرونا يا أولاد الحرامية يا ….. 
• وبرضك زي ما بيقول الرُّكاب للسواق البلطجي اللي بيخبط فيهم شمال ويمين وياخد كل المطبات، ويخلي روسهم تخبط في سقف الميكروباص وهو واخد احلى اصطباحه وكام قرص ترامادرل :  فنقوله: كلنا واحنا مَيِّتـين من الخوف  (لا يا أسطى إنت زي الفل.. إحنا اللي مبنعرفش نركب ) !

• الحكومة الشريفه  بقت زي البلطجي اللي ماسك للشعب سِنجه وسايقه وبيقلبه وبياخد كل اللي ف جيبه بالعافية. 

 •الحكومة عارفه إن اخرنا كلمتين على الفيس أو جملتين في مقال، وكل فترة تعتقل شوية من الشعب الحرامي تِخَّوف  بيهم الباقيين.

• الحكومة عارفه إنُه مفيش حد هيغيرها بالبتاع ده اللي اسمه صندوق والبتاعة دي  اللي اسمها انتخابات، وكلام فاضي ، فالحكومة بذات نفسها بتجيب أجهزتها الرقابية: سواء المعينة أو المنتخبة ، وهي اللي بتجيب صناديقها  ونوابها ومعارضتها  ووزراءها وقوانينها ولوايحها وبابا غنوشها وبأحدث  طرق الانتخابات الذكية، وبتحط الأصوات في مفرمة صناديقها  وبتخرَّج  من الناحية التانية نوابها : موالاه ومعارضه- وكلهم جايين بمزاجها وتحت عنيها ، واللي يعارضنا بجد ميلزمناش ويروح يعارض عند أمه لمؤاخذه  – دا لو كان متربي وليه أم أصلًا ربته وإلا مكنش طلع معارض وحرامي كهربا كده  -  

• • (انتخاباتنا)  ترامب بيحسدنا عليها بصراحة، وبيقول: يا ريتني كنت أنا!

• الحكومة ضاربة شهادتها عيني عينك واللي ما  يشتري يتفرج وبتتهم الشعب بالسرقة!!

الحكومة قالت إننا هنبقى مركز إقليمي للطاقة وبقينا مش لاقيين غاز نولَّع اللمضة نمرة خمسة بتاعة ستي، وتتهمنا إحنا بالسرقة!!

• ممكن  تقوليلنا  يا حكومة: مؤسساتك  السيادية والعادية:  المركزية والمحلية اللي مشغلة تكيفاتها ع البحري ليل نهار  بتدفع كام  فواتير كهربا ؟! 

• طب ممكن  تقوليلنا يا  حكومة مزارع رجالتك وفتواتك اللي بكل صحارى مصر واللي مشغلة آبار جوفية وتكييفات وكشافات بالكهرباء بيدفعوا كم ف الشهر ؟! وهل فيه حد من مباحث الكهربا ولا معدات الحكومة الذكية يِهَوِّبوا ناحية بواباتها ؟! 

• تقدر الحكومة تقلنا كم فاتورة المرتبات اللي بياخدوها كبار كبار  رجالتها من الموظفين والمستشارين  في شركات الكهرباء كام يا حكومة ؟! علشان نعرف ايه اللي بيضاف على فواتيرنا وبندفعه من دم قلبنا علشان ياكلوه الكبار بالسم والهاري ويبنوا بيه قصور لعيالهم واحفادهم والشعب بياخدوا منه اللقمة الحاف ؟. 

• تقدري تقلنا الحكومة الحرامية اللي  بتتهمنا  كشعب بالسرقة، بتدفعي كام  فواتير كهربا في مقراتك الشتوية والصيفية والإدارية والمهلبية، وف مصر اللي بقت مصرين، وليه دا كله على حساب الشعب- الفقير قوي قوي يا بوي- الشعب  اللي بتقولي عليه حرامي، وخليتيه واقف يشحت تحت كباريك القش!! 

• إحنا مش حرامية يا حكومة!! أنت اللي حرامية وجبتي قروض بعشرات المليارات من الدولارات واليورهات ومادَه ايديكي اللتنين وبتقولي لكلاب السكك: هات هات 

اخدتي  قروض وعملتي محطات بتنتج أضعاف احتياجاتنا وقلتي هتصدري كهربا، ولا صدرتي كهربا ولا غاز وبقت المحطات قيمة مهدرة وعمرها الافتراضي هيخلص من غير شغل، وبتضيفي القروض وأقساطها وفوايدها على فواتيرنا، وتقولي علينا حرامية يا بِت الـ …

• الحكومة ضافت من ٢٠١٤ لـ ٢٠٢٠ ( ٣٨) محطة توليد كهربا بقدرة ٣٢،٤٥٨ جيجا وات بتكلفة( ١٧،٥ مليار دولار)  لغاية ما وصلت قدراتنا لـ ٦٠ جيجا وات بفايض ٢٤ جيجا وات ( ومش قادرين نصدر منهم حاجة وبكده بقت عنده طاقة مفقودة وفلوس مرمية واحنا كشعب حرامي بندفع اقساطها وفوايدها من دم قلبنا ) 

• وزي ما بتقول  عبلة جادو أستاذة هندسة القوى الكهربائية بجامعة المنوفية والمديرة العامة للدراسات والتطوير في شركة جنوب الدلتا لتوزيع الكهرباء سابقاً، لموقع درج في تحقيقه الرائع تحت عنوان (فائض مفقود: المصريون يدفعون فاتورة محطات الكهرباء مرتين

( المحطات تعمل وفقا للاحتياج الفعلي من الكهرباء خلال اليوم، ما يجعل المحطات المتبقية متوقفة وتستهلك وقودًا، لكنها لا تعمل ولا يخرج منها كهرباء، ما يقلل من عمرها الافتراضي)

https://n9.cl/lhnbk

• الحكومة عملت محطة العاصمة الإدارية الجديدة على مساحة  ١٧٥ فدانًا، وبتكلفة بلغت ٢,٠١٤ مليار يورو + ٥١,٣٤ مليون جنيه (موقع رئاسة الجمهورية)

https://2u.pw/7U3fJ6eN

.ضمن اتفاقية محطات مع شركة سيمينز بتكلفة ٨ مليار يورو

• الشعب مش حرامي يا حكومة، إنت اللي حرامية  وفاشلة ، وسعر الكهربا تكلفته بتزيد  علشان انتِ جبتي  قروض وضيعتيها  وخليتي سمعة جنيهنا  وقيمته ف الأرض وزي ما بيقول الدكتور حافظ سلماوي رئيس تنظيم مرفق الكهرباء ان تكلفة انتاج الكيلو واط زادت ٦٠٪؜ نتيجة تغيير سعر الدولار ٣ مرات من ١٥ و٧٠ قرشاً ل ٣١ جنيهًا وأخيرا لـ ٤٧ ( دي تصريحاته في شهر مايو،  مكنش لسه الدولار وصل لـ ٤٨،٧٥ )، يعني انت يا حكومة تعومي وتنفذي أوامر صندوق النكد واحنا اللي ندفع التمن

• الحكومة عملت إعلانات وعايزه الشعب يشتغل مخبر عندها ويبلَّغ عن بعضه، وأنا أهه ببلغ الحكومة عن اللي بيسرق التيار وبيسرق الشعب: إنت يا حكومة سارقة التيار وسارقة الشعب ومجوعاه، فيا ترى هتراجعي مؤسساتك وسياساتك، وكِبار كِبارك ولا هتحبسي المُبَّلغ ؟! وده برضه مش هيرحمك من غضب الشعب الساطع  الآتي لو محطتيش عقلك ف راسك. !!