السيسي: الحرب على الإرهاب كلفتنا 90 مليار جنيه.. و«الصعب هيعدي»

قال الرئيس عبد الفتاح السيسي، في كلمته بالندوة الـ37 للقوات المسلحة: «الحرب اللي هناك  (في سيناء) ماكنتش بسيطة، ولو جبنالكم الأفلام وهي موجودة على الإنترنت، هتشوفوا حجم الخسائر والدمار والخراب الذي تم والناس اللي ماتت، أنا والله لولا رأفة بالمصريين أوريكم فيلم واحد، أنا متهيألي كل المصريين مش هيناموا لو أذعتلكم فيلم واحد عن اللي كانوا بيعملوه وده متصور، فكان عندي خيارين إني أشيلكم الهم علشان الحرب، ونحشد كل جهود الدولة للحرب ومفيش حاجة تانية، لكن لم نفعل هذا لأن الرأي الأول رأي السياسة، والشكل التاني الجري بكل همة وما أوتي من قدرة لإنهاء المشكلة وكمان بناء البلد التي كانت في ظروف صعبة جدا وتزايدت الأمور بأوضاع 2011 و2012 و2013».

وأضاف الرئيس: «إحنا خدنا الطريق التاني، أولادنا بيحاربوا هناك، والبلد بتحارب هنا في معركة تانية علشان الأمور، والحمد لله أنجزت هذه المهمة بنجاح، ولازم نكون ديما منتبهين وديما يفضل السلاح صاحي، أنا عمري ما اتكلمت في العلن كده، وديما لما كنت بقول السلاح صاحي كان المسئولين عن الإعلام يشيلوها من المقطع لما تكون متسجلة، مش هيقدروا يعملوا كده دلوقتي».

وعن تكلفة الحرب على الإرهاب في سيناء، قال الرئيس عبد الفتاح السيسي: «كان كل شهر مليار جنيه لمدة 90 شهر على الأقل».

ووجه الرئيس السيسي رسالة إلى المصريين، قائلاً: "مهم قوي مش رسالة للمصريين الطيبين بس حتى الأشرار، لما حصل الكلام من سنين كنا بنقول إن الكلام ده هينتهى ومفيش إرهاب بيهد بلد، لو كانت البلد على قلب رجل واحد، فيه مقدرات وتكلفة غير الأرواح بتتقدم من البلد، لكن أكيد اليوم هيجيي وفيه نهاية إللى إحنا كنا بنشوفه قبل عشر سنين».

وأكد الرئيس السيسي، أن كل الظروف الصعبة «بتعدي بفضل الله سبحانه وتعالى» مضيفا: "الحقيقة مش عارف اقرأ الكلمة ولا أقول مشاعرى وإحساسي باليوم ده، عاوز أقول انا من الناس اللى حضرت الأحداث وشافتها وهى بتتعمل وبتترتب بشكل أو بآخر، وزى ما انتوا شوفتوا الاحتفال كله وكل البرنامج النهاردة يعكس حاجة واحدة بس، إن مهما كانت الصعوبات اللى بتقابلنا والظروف الصعبة اللى بنواجهها بفضل الله الأمور بتعدي».