كهربا: قدرت أقف على رجلي بعد إيقاف 6 شهور .. وربنا نصرني

وجه محمود عبد المنعم كهربا نجم الفريق الأول لكرة القدم بالنادى الأهلي رسالة شكر إلى مسئولي ناديه والجهاز الفني وزملاءه عقب انتهاء موسم وصفه كهربا بأنه الأصعب في مسيرته.

وجاء نص ما نشره كهربا على صفحته على موقع التواصل الاجتماعي “فيسبوك” : "بعد إيقاف ٦ شهور الحمد لله قدرت أقف على رجلي تاني وبسرعة جدا وأكمل مسيرتي موسم صعب وكله ضغوطات انتهى بأن الأهلي بطل كل حاجة وبكرم ربنا ودعم جمهور الأهلي قدرنا نحقق كل البطولات إللي شاركنا فيها".

أضاف:"مكنش هينفع إننا نستسلم في وسط الطريق كان لازم نكمل للآخر زي الأهلي ما عودنا كنت بستني الإيقاف ينتهي بفارغ الصبر علشان أقدر أشارك واجتهد،  اتعرضت لضغوط كتير وناس بتحاول إنها تعطلني بس ربنا كان ديما في ضهري و نصرني الحمدلله، فا أي ضغط من الضغوطات الكتير الي اتعرضتلها كنت برميه ورا ضهري".

تابع: "ركزت في تمريني واركز في الملعب وأسعد جمهور النادي في محاولة إني أرد و لو جزء بسيط من فضل جماهير النادي في دعمهم ليا ووقوفهم في ضهري من أول يوم كنت فيه في النادي ولا أي كلام هيوفيهم حقهم ولا هيوصف اللي في قلبي من ناحيتهم الحمد لله".

وواصل:" قدرنا نحقق كل حاجه وفي النهاية بشكر كل شخص قدملي المساعده ووقف جنبي من اول بيتي النادي الأهلي ومجلس الإدارة والمدير الفني والجهاز بأكمله  وأخواتي في الملعب إلى عمال غرفة الملابس والمنظومة جميعا واشكر عائلتي الداعم الحقيقي والدائم في كل الأوقات.. بشكر كل إللي وقف جمبي وكان بيشجعني وكان حافز إني أكمل ومستسلمش  شكرا من كل قلبي".