انفراد.. مسؤول النادي الأهلي المتهم بتجارة المخدرات: أنا ابن ناس وأبويا كان مدير بنك.. وأخويا عايش في فيلا
تواصل "ذات مصر" نشر نص التحقيقات واستجواب مسؤول بارز بالنادي الأهلي استغل معرفته وعلاقاته بتجار المخدرات، ليصبح واحد من كبار تاجر المخدرات، وذلك أمام النيابة العامة، والتي جاءت كالتالي...
نص الاستجواب
- حدد لنا ظروف نشأتك تحديدا؟
*** أنا اتولدت عام 1987 في شقة أبويا في جاردن سيتي.. واتولدت في أسرة مكونة من أبويا وأمي واخ وأخت وأنا أصغر اخواتي.. والدي كان شغال مدير بنك المصري التجاري ووالدتي كانت شغالة في وزارة التضامن الاجتماعي، وأختي الكبيرة شغالة مدرسة لغة انجليزية في مدرسة حكومية في الجيزة ومتزوجة من دكتور جامعة بيدرس في كلية تربية رياضية في فيصل، وأخويا موظف في نفس البنك الي أبويا كان شغال فيه، وهو دلوقتي مدير الشئون الإدارية في البنك، واحنا حالتنا المادية كانت كويسة جدا وميسورين الحال، وأبويا دخلني أنا وأخويا مدارس لغات، واختي متخرجة من جامعة بيروت في الإسكندرية، وأنا اتعينت في النادي الأهلي بالجزيرة، وعندي شغل تاني بعد الظهر مسؤول تحصيل بشركة ديار للمباني الهندسية، ومتجوز بقالي سنتين ومراتي حامل.
- وما هو متوسط دخل كل من أفراد أسرتك؟
*** أنا معرفش زمان مرتباتهم كانت كام، بس دلوقتي والدتي بتقبض معاش أبويا ومعاشها حوالي 11 ألف جنيه، واخواتي معرفش مرتباتهم بالضبط، بس هما مرتاحين وحاتهم كويسة.. يعني أخويا مثلا عايش في فيلا في حدائق الأهرام ومتجوز مهندسة وحالته كويسة، وأختي نفس النظام.
- كم المبلغ الذي كنت تتقاضاه من والدك منذ الطفولة؟
*** أنا والدي كان بيصرف عليا من وأنا لسة طفل حتى لما اشتغلت كان بيساعدني وبيديني فلوس وجابلي عربية من وأنا في الكلية، وغيرهالي لما اتخرجت.. وأنا مكنش ليا مصروف معين.. الي عاوزه بأخده.
- وما هو مصدر دخلك؟
*** أنا شغال في النادي الأهلي وبقبض حوالي 8 ألاف جنيه شهريا غير المكافأت، وبأخد من شركة الديار حوالي من 10 الاف وحتى 25 ألف جنيه، على حسب النسبة الي بأخدها من التحصيل الي بيدخل الشركة.
- وما هو اختصاصك الوظيفي تحديدا في تلك الوظائف؟
*** أنا مسؤول عن تخليص اجراءات النادي الإدارية مع الجهات الحكومية بتفويض رسمي، وبالنسبة لشركة الديار فهي شركة بتبني مشاريع عقارية وبتبيع للعملاء، وأنا دوري بحصل وبشرف على الموقع.
