ماذا كتب الفنان تامر ضيائي قبل وفاته عن "موت الفجأة" ؟
![ذات مصر](/Upload/files/0/4/53.jpg)
تُوفي الفنان تامر ضيائي اليوم الأربعاء بعد فترة قصيرة من نشره وصية مؤثرة على "موت الفجأة" عبر صفحته الشخصية على موقع فيسبوك قال فيه.
"بوست وصية ده هيفضل باين علي صفحتي لحد ما أموت..
الحقيقة إللى كلنا عارفينها و متأكدين منها إننا كلنا ربنا كتبلنا إننا نموت فى ميعاد محدد غير معروف، وعشان كده كتبت الكلام ده لأنى محتاج حاجات معينه تتعمل و حاجات خايف تتعمل وأنا مش عايز حد يعملها لمجرد إنها معروفه، ووقتها طبعاً مش هعرف أقولها لحد ..
*و دي وصيتي*
١) صلاة الجنازة أهم من العزا و هى إللى كل ما العدد زاد كل ما ثوابى ما كان أكتر، فأرجوكم تصلوا عليا.
٢) مش شرط تيجى العزا وياريت لو إتعمل فى البيت أو مكان بسيط بفلوسه تطلعولى صدقة جارية أفضل.
٣) من فضلكم لم يثبت أو يتفق عليه عمل خاتمة قرآن للمتوفى إنها هتوصله، بس مثبت إن الدعاء والصدقة بيوصلوا للميت، فرجاء دى بالذات بلاش وإدعولى الوقت اللى هتقروا فيه جزء فضوا نفسكم وإقعدوا إدعوا فيه.
٤) بلاش صدقة جارية تقليدية وسهله ومش مستفاد بيها يعنى المصاحف كتير فى مصر اوى وكل بيت فيه كتير فممكن نحط الفلوس فى جامع بيتبنى أو كرسى متحرك فى مستشفى يستفادوا بيه المرضى أو دخول مياه لبيت غلابه أو بناء سقف لبيت فقراء، حاجات ناس تستفيد بيها لمدة طويلة.
٥) دى نقطة مهمه اوى بالنسبة ليا .. محدش يقول لحد بتعيط عليه لية، ومتعيطش عشان هو بيتعذب!! الكلام دة غلط، سيبوهم يعيطوا لحد ما يطلعوا كل الشعور اللى عندهم و مفيش حاجه بتقول إن العياط معناه عدم رضا بقضاء ربنا "وأبيضت عيناه من الحزن فهو كظيم".
٦) أهم حاجة تانى هى الدعاء وبس والصدقة.
٧) من فضلكم تكثفوا الدعاء وقت نزول القبر وتتصدقوا بأى حاجه بنية إن ربنا يجعل قبرى روضه من رياض الجنه ويثبتنى عند السؤال لأن ده أهم وقت ليا وياريت كمان بعد ما تدفنونى تقعدوا معايا شوية ومتستعجلوش تمشوا عشان تونسونى فى ليلة زى دى.
٨) الموت علينا كلنا حق وإحنا كلنا أمانات ربنا وهيردنا تانى، فالحزن على الفراق هونوه على نفسكم بالدعاء ليا عشان أبقى فى سعادة لحد ما أقابلكم تانى.
٩) اللي بيحبوني يدعولى كتير عشان لو مفيش حد يدعيلى.
١٠) ودى مهمة أوى أوى أوى عاوز الكل يسامحني علي اي حاجه عملتها فيه بقصد لو يدون قصد
"اللهم إن كثر موت الفجأة من حولي و كثر موت الشباب غفلة، ف يارب إن كنت أنا القادم فأحسن خاتمتي وارزقني نطق الشهادة عن الموت و يسّر طلوع روحي و هوّن عليّ سكراتي فإني أحب أن ارحل في هدوء و سكينة و طمأنينه، ولا تقبض روحي إلا و انت راضٍ عني لكي اكون عبدا مقبولا عندك حتي أليق بلقائك العظيم و إن كان لي من العمر باقي فأغفر لي ذنوبي و معاصي نفسي الأمّارة بالسوء و أعفو عني و أمحو لي كل ما يعرقل طريقي إليك و ردّني إليك ردّاً جميلاً يارب العالمين".
وأعرب الفنان عمرو عبد العزيز عن حزنه الشديد لرحيل الفنان، حيث كتب على صفحته قائلاً: "كده يا تامر، تمشي فجأة كده، وتخضنا كلنا، لا إله إلا الله ..الله يرحمك يا حبيبي، ويجعل مثواك الجنة يارب العالمين".
وذكرت تقارير صحفية محلية نقلاً عن أشرف زكي نقيب المهن التمثيلية، أن وفاة تامر ضيائي جاءت بعد تعرضه لحادث اعتداء مفاجئ من أحد الأشخاص، حيث كان برفقة زوجته التي تعالج من مرض السرطان. وأشارت التقارير إلى أن الشرطة تحقق في الحادث حالياً.
تداول نشطاء على نطاق واسع وصية الراحل، التي أعرب فيها عن رغبته في حسن خاتمته وسهولة رحيله بسلام، وأوصى بالتصدق على روحه والدعاء له بدلاً من البكاء، وحث على الحرص على صلاة الجنازة دون تجاوزات.
تامر ضيائي شارك في عدد من الأعمال الفنية المهمة خلال مسيرته، منها أفلام "واحد من الناس" و"رامي الاعتصامي" و"واحد صفر" و"حظ سعيد"، إضافة إلى مسلسلات مثل "الصياد" و"نصيبي وقسمتك" و"بركة" و"عملة نادرة".