د. جمال شعبان: «الضربة الساقطة» بمعدل أكثر من 10% تسبب اعتلالًا في القلب
أوضح الدكتور جمال شعبان، أستاذ أمراض القلب وعميد المعهد القومي للقلب سابقا، تفاصيل حول الضربة الساقطة وكهرباء القلب، معلقا: «فيه ناس كتير بتقول يعني ايه الضربة الساقطة ويعني ايه زيادة في كهرباء القلب.. مش معنى إن في زيادة في كهرباء القلب إن لو حد لمسك يتكهرب».
أسباب الضربة الساقطة وكهرباء القلب
وقال الدكتور جمال شعبان: «لما حد يشتكي ويقول قلبي هيقف من صدري يا دكتور روحي بتتسحب مني يا دكتور باحس بخبطة جامدة في قلبي.. معدتي بتقلب عليا وبعدين احس برفة في قلبي كل دي أعراض الضربة الساقطة».
وأضاف أستاذ القلب: «هي ساقطة مش معناه مش ناجحة لكن لما البؤرة الكهربية الشاردة اللي برا الدايرة الكهربية الطبيعية الربانية بتيجي بدري عن موعدها كأنها مبتسرة زي الطفل اللي بيتولد بدري بيسموها premature الضربة الطبيعية بتسقط ما بتجيش في موعدها لأن القلب بيعتبر نفسه قام بضربتين بمجهود زيادة فبيرتاح جزء من الثانية دي الشخص بيحسها زي سحبة روح أو توقف في التنفس أو كأنه انفصل من الحياة لوهلة».
تشخيص الضربة الساقطة
وتابع عميد المعهد القومي للقلب سابقا، بأن الضربة الساقطة من الممكن تكون من البطين ومن الممكن أن تكون من الأذين، فالضربة الساقطة من البطين هي الأهم، وخاصة إذا كان معدلها متزايدا، أي بالآلاف في اليوم، معلقا: «واحد يقول لي بالآلاف اقول له أيوه لأن القلب في اليوم بيشتغل 100 ألف مرة. غير المتخصصين ممكن يشخصوا حالتك علي أنها حالة نفسية ساعات بنحتاج نعمل رسم قلب مستمر 24 ساعة أو 48 ساعة أو حتى أسبوع بجهاز (الهولتر) علشان نعرف عددها ونسبتها وخاصة لو ما ظهرتش في رسم القلب العادي».
مضاعفات الضربة الساقطة وعلاجها
ونوه الدكتور جمال شعبان: «عندما تكون النسبة أكبر من 10% من الممكن أن تؤدي إلى حدوث اعتلال في عضلة القلب PVC cardiomyopathy وساعات يحتاج المريض إلى عمل رنين مغناطيسي حتى يتم التأكد من تركيب جهاز صدمات أو عمل عملية كي، خاصة أن الأدوية من الممكن أن تفيد في حالات كثيرة ولكن الكي بموجات الراديو مع الجهاز ثلاثي الأبعاد يمكن أن يكون هو الحل النهائي».
